RULINDO:Abayobozi b'Akarere bifatanyije n'abaturage mu nteko zibanze ku gukangurira Abaturage kwihutisha kwishyura ubwisungane mu kwivuza no gukumira indwara ya RVF

Kuri uyu kabiri, abagize Komite Nyobozi y'Akarere hamwe n'abagize inzego z'umutekano bitabiriye inteko z'abaturage zabereye mu tugari dutandukanye turi inyuma mu bipimo by'ubwitabire bwo kwishyura umusanzu w'Ubwisungane mu Kwivuza (Mutuelle de Santé).

Umuyobozi w'Akarere, Madamu Mukanyirigira Judith, yifatanyije n'abaturage bo mu Kagari ka Mushari, Umurenge wa Mbogo. Umuyobozi w'Akarere Wungirije ushinzwe Iterambere ry'Ubukungu, Bwana Rugerinyange Theoneste, yitabiriye inteko y'abaturage bo mu Kagari ka Rurenge, na ho Umuyobozi w'Akarere Wungirije ushinzwe Imibereho Myiza y'Abaturage, Bwana Mutaganda Theophile, yifatanyije n'abaturage bo mu Kagari ka Marembo, Umurenge wa Cyungo.

Muri izo nteko, abaturage basobanuriwe akamaro ko kwishyura ku gihe umusanzu w'Ubwisungane mu Kwivuza, basabwa kurushaho kwitabira gahunda kugira ngo buri muturage abashe kubona serivisi z'ubuvuzi igihe azikeneye.

Abayobozi banakanguriye abaturage gukomeza ingamba zo kwirinda no kurwanya indwara ya Rift Valley Fever (RVF), bibutswa gukurikiza amabwiriza y'inzego zibishinzwe no gutanga amakuru ku gihe igihe babonye amatungo agaragaza ibimenyetso by'iyi ndwara.

Inteko z'abaturage zanabaye umwanya wo kwakira no gukemura ibibazo by'abaturage, aho abayobozi bumvise ibitekerezo n'ibibazo bitandukanye byatanzwe, bimwe bikemurirwa aho, mu gihe ibikeneye ubundi bukurikiranwe byashyikirijwe inzego zibishinzwe kugira ngo bikemurwe mu buryo bwihuse.

Akarere gakomeje gushimangira ko kwegera abaturage no kubatega amatwi ari imwe mu nkingi z'imiyoborere myiza, bityo abaturage bakaba bakangurirwa gukomeza kugira uruhare mu bikorwa bigamije iterambere n'imibereho myiza yabo.