Ibi yabigarutseho kuri uyu wa kabiri mu nama umuyobozi Madamu w’Akarere MUKANYIRIGIRA JUDITH ari kumwe n’umuyobozi w’akarere wungirije ushinzwe iterambere  ry’ubukungu RUGERINYANGE Theonest bagiranye n’abakozi bashinzwe ubuhinzi mu Karere hamwe n’umufatanyabikorwa mu buhinzi mu buhinzi One Acre Fund /Tubura.

Iyi nama yarigamije kurebera hamwe ibyagezweho mu gihembwe cy'ihinga 2025 B ku bufatanye na One Acre Fund/Tubura no gutegura igihembwe cy'ihinga cya 2026A.

Muri iyi nama abashinzwe ubuhinzi basobanuriwe icyerekezo cy'igihugu 2050  n'ibikubiye mu nkingi y'ubukungu muri gahunda y'igihugu yo kwihutisha iterambere NST2,basabwa kwegera abaturage bakabafasha kuzamura umusaruro w'ubuhinzi.

IRADUKUNDA Janvier ushinzwe guhuza inzego za Leta na One Acre Fund/Tubura mu ntara y'amajyaruguru n'iyuburengerazuba ashima uburyo abaturage b’abakarere ka Rulindo bitabira gukorana n’umushinga wa Tubura bafata ifumbire n’imbuto yo guhinga ndetse akaba yizeza ubuyobozi bw’Akarere  kuzakomeza gukorana n’abahinzi bo mu karere ka Rulindo bakabafasha kuzamura umusaruro. 

Umuyobozi w’akarere MUKANYIRIGIRA Judith yibukije abashinzwe ubuhinzi mu karere ko ubuhinzi aribwo shingiro y’imibereho y’abaturage b’akarere ka Rulindo,asaba ko babafasha kuzamura umusaruro wubuhinzi. Yagize ati :”abaturage b’akarere ka Rulindo barenga 80% batunzwe n’ubuhinzi musabwe kubegera mu kabakangurira guhinga ubutaka kandi mu kabafasha guteza imbere ubuhinzi bakagira ubuhinzi bugira aho bubakura bukagira aho bubageza mu buryo bw’iterambere.”

Mu karere ka Rulindo One Acre Fund ikorana n’abahinzi bagera ku bihumbi 51352,ubuyobozi bw’Akarere bukaba bushima  One Acre Fund/Tubura ku ruhare igira mu gufasha abaturage kubona inyongeramusaruro n’imbuto y’ibigori, babizeza gukomeza ubufatanye.