Muri iki gihe twibuka ku nshuro ya 32 Jenoside yakorewe Abatutsi mu 1994, Akarere ka Rulindo kashyizeho gahunda yo kwigisha no gusobanurira urubyiruko amateka ya Jenoside hagamijwe gukumira ingengabitekerezo ya Jenoside mu bakiri bato no guteza imbere ubumwe n’ubwiyunge.

Iyi gahunda iri gushyirwa mu bikorwa binyuze mu gusura inzibutso za Jenoside yakorewe Abatutsi, aho urubyiruko rwigishwa amateka nyakuri yaranze Jenoside ndetse n’ingaruka zayo ku gihugu n’Abanyarwanda muri rusange.

Kwikubitiro, urubyiruko rwo mu Murenge wa Mbogo rwatangiye rusura Urwibutso rwa Jenoside yakorewe Abatutsi rwa Mbogo tariki ya 08 Mata 2026. Nyuma yaho, hakurikiyeho urubyiruko rwo mu Murenge wa Burega ,Cyinzuzi na Ntarabana, rwasuye Urwibutso rwa jenoside rwa Remera tariki ya 09 Mata 2026.

Muri iyi gahunda, urubyiruko ruherekezwa n’abayobozi batandukanye barimo ab’inzego z’ibanze n’iz’umutekano, aho babafasha kumva neza amateka ya Jenoside. Basobanurirwa uko Jenoside yateguwe ikanashyirwa mu bikorwa n’ubuyobozi bubi bwariho mbere yayo, ndetse n’uruhare buri wese afite mu kuyirwanya no kubaka ejo hazaza heza h’igihugu.

Ubwo Umuyobozi w’Akarere MUKANYIRIGIRA Judith yifatanyaga n’urubyiruko rwo mu murenge wa Mbogo mu gusura urwibutso rwa jenoside rwa Mbogo yasabye uru rubyiruko guharanira ko kubaka igihugu cyiza kizira amacakubiri babigizemo uruhare  yagize ati:

“Gusura inzibutso si ugusubiza amaso inyuma gusa, ni umwanya wo kwigira ku mateka kugira ngo twirinde ko ibyabaye byongera kubaho. Urubyiruko ni rwo Rwanda rw’ejo, ni yo mpamvu tugomba kurwubakira ku kuri no ku ndangagaciro zo gukunda igihugu no kubaha ubumuntu.”

Urubyiruko rwitabiriye iyi gahunda narwo ruvuga ko byarufashije kumenya byinshi rutari rusanzwe ruzi, ndetse bituma rufata ingamba zo kurwanya ingengabitekerezo ya Jenoside.

Umwe mu rubyiruko rwo mu Murenge wa Ngoma yagize ati:“Gusura uru rwibutso byankoze ku mutima cyane. Numvise neza amateka ya Jenoside n’uburyo yateguwe. Byanyeretse ko dufite inshingano zo guharanira ukuri no kurwanya abapfobya n’abahakana Jenoside yakorewe Abatutsi mu 1994.”

Akarere ka Rulindo kagaragaza ko iyi gahunda izakomeza no mu yindi mirenge yose, hagamijwe ko urubyiruko rwose rubona amahirwe yo gusobanukirwa amateka ya Jenoside yakorewe Abatutsi, bityo rukagira uruhare mu kubaka ubumwe n’ubwiyunge n’iterambere rirambye ry’igihugu.

Ibi bikorwa ni imwe mu nzira zifatika zo guha urubyiruko ubumenyi n’indangagaciro bikenewe mu kubaka u Rwanda ruzira amacakubiri, rushingiye ku bumwe, amahoro n’ubudaheranwa.