Mu rwego rwo gukomeza ubukangurambaga bwo gukumira ibyaha no guteza imbere imibereho myiza y’abaturage, kuri uyu wakabiri Umuyobozi w’Akarere Wungirije ushinzwe Imibereho Myiza y’Abaturage,  MUTAGANDA Théophile, ari kumwe na Minisitiri w’uburinganire n’iterambere ry’umuryango UWIMANA Consolée, Umuyobozi wa RIB mu Ntara y’Amajyaruguru, ndetse n’abagize Inama y’Umutekano Itaguye y’Akarere, bifatanyije n’abaturage bo mu Mirenge ya Tumba, Base, Bushoki na Kinihira mu Nteko y’Abaturage ihuriweho yabereye mu Kagari ka Nyirabirori. yibanze ku bukangurambaga bwo gukumira icyaha cyo gusambanya abana, kimwe mu byaha bikomeje kugira ingaruka zikomeye ku mibereho n’iterambere ry’abana. 

Abaturage bitabiriye basobanuriwe amategeko ahana iki cyaha ndetse n’ibihano bikakaye bihabwa umuntu wese ugihamijwe n’inkiko.

Abayobozi basabye abaturage gukomeza kugira uruhare rugaragara mu gukumira no kurwanya iki cyaha batanga amakuru ku gihe ku bantu bakekwaho ibikorwa bishobora guteza abana ibibazo, ndetse no kurushaho gukaza ingamba zo kubarinda ihohoterwa iryo ari ryo ryose.

Mu butumwa bwatangiwe muri iyi nteko, hanagarutswe ku kamaro ko kubaka umuryango ushoboye kandi utekanye. 

Minisitiri w’Uburinganire n’Iterambere ry’Umuryango yasabye abaturage kurangwa n’ubufatanye, kubungabunga ubumwe bw’umuryango no kwirinda amakimbirane yo mu ngo, kuko ari umwe mu musingi w’iterambere rirambye n’imibereho myiza y’abaturage.

Abaturage bitabiriye iyi nteko biyemeje gukomeza gufatanya n’inzego zitandukanye mu gukumira ibyaha, kurinda abana no guteza imbere umutekano n’iterambere by’umuryango nyarwanda.

Iyi nteko y’Abaturage ni kimwe mu bikorwa bigamije kwegera abaturage, no gukemura ibibazo byabo hagamijwe  guteza imibereho myiza y’abaturage.