RULINDO: HATANGIJWE GAHUNDA YO KWITA KU BANA N'URUBYIRUKO MU BIRUHUKO

Akarere ka Rulindo katangije  gahunda yo kwita ku bana n'urubyiruko mu biruhuko, igamije kubafasha kumara ibiruhuko mu bikorwa bibubaka, bibarinda ibishobora kubangiriza ubuzima banatozwa indangagaciro z'umuco nyarwanda.

Ku rwego rw'Akarere, iyi gahunda yatangirijwe mu Murenge wa Kinihira, iyobowe n'Umuyobozi w'Akarere ka Rulindo, Madamu Mukanyirigira Judith, ari kumwe n'Umuyobozi w'Akarere Wungirije ushinzwe Imibereho Myiza y'Abaturage, Bwana Mutaganda Théophile, ndetse n'abahagarariye inzego z'umutekano.

Muri iki gikorwa, abayobozi bifatanyije n'abana n'urubyiruko mu mikino n'imyidagaduro itandukanye, hagamijwe kubafasha gusabana no gukoresha neza igihe cy'ibiruhuko binyuze mu bikorwa bibafitiye akamaro.

Hanatanzwe ibiganiro n'ubutumwa bwibanze ku kubaka uburere bwiza bw'abana n'urubyiruko. Basobanuriwe amateka y'igihugu, indangagaciro z'umuco nyarwanda ndetse n'intego y'iyi gahunda, igamije kubarinda imyitwarire n'ibikorwa byose bishobora kubashyira mu kaga.

Mu ijambo rye, Umuyobozi w'Akarere ka Rulindo, Madamu Mukanyirigira Judith, yibukije abana, urubyiruko, ababyeyi n'abatoza ko gahunda yo kwita ku bana n'urubyiruko mu biruhuko yashyizweho kugira ngo ikumire ikintu cyose cyahungabanya ubuzima, umutekano n'iterambere ry'abana n'urubyiruko.

Yasabye ababyeyi gukomeza gukurikirana abana babo no kubashishikariza kwitabira iyi gahunda, anashimira abatoza n'abafatanyabikorwa bazagira uruhare mu kuyishyira mu bikorwa.

Yatangaje kandi ko ibikorwa by'iyi gahunda bizajya bikorwa inshuro eshatu mu cyumweru, bikagenerwa abana hakurikijwe ibyiciro by'imyaka yabo, mu rwego rwo kubafasha kwiga, gukina no kwidagadura mu buryo bubafasha gukura neza.

Gahunda yo kwita ku bana n'urubyiruko mu biruhuko izashyirwa mu bikorwa mu mirenge yose igize Akarere ka Rulindo, ikaba igamije guteza imbere uburere buboneye, kwimakaza umuco wo gukunda igihugu no kurinda abana n'urubyiruko ibishobora kubashyira mu byago mu gihe cy'ibiruhuko.