RULINDO : Abafatanyabikorwa b’Akarere bashimiwe uruhare rwabo mu iterambere ry’Abaturage.

Mu imurikabikorwa ry’abafatanyabikorwa b’Akarere ryari rimaze iminsi itatu ribera mu karere ka Rulindo abafatanyibikorwa bashimiwe uruhare rwabo no gufatanye n’ubuyobozi bw’Akarere mu guteza imbere  imibereho myiza y’abaturage. 

Iri murikabikorwa ryari rifite insanganyamatsiko igira iti “Uruhare rw’Abafatanyabikorwa mu Kubaka Umuryango Ukomeye”, rikaba ryarahuje abafatanyabikorwa batandukanye bakorera mu Karere ka Rulindo, ibigo bya Leta bifite ibikorwa mu Karere, abikorera ndetse n’imiryango mpuzamahanga.

Mu gihe cy’imurikabikorwa, abafatanyabikorwa bagaragaje ibikorwa n’imishinga bakorera mu Karere, bigamije guteza imbere imibereho myiza y’abaturage no guteza imbere ubukungu bw’Akarere.

NYIRURUGO Emmanuel uhagarariye abagize ihuriro ry’Abafatanyabikorwa mu karere ka Rulindo yashimiye Abafatanyabikorwa bose bitabiriye imurikabikorwa ry’uyu mwaka anashima ibikorwa byabo ndetse na serivise zabo bigamije guteza imbere Akarere n’abaturage muri rusange.

Mu ijambo rye risoza iri murikabikorwa, Umuyobozi w’Akarere wungirije ushinzwe iterambere ry’ubukungu, Bwana RUGERINYANGE Theoneste, yashimiye abafatanyabikorwa uruhare rukomeye bagira mu iterambere ry’Akarere, by’umwihariko mu gukemura ibibazo bibangamiye imibereho myiza y’abaturage.

Yagaragaje ko ubufatanye hagati y’Akarere, abafatanyabikorwa, inzego za Leta n’abikorera ari ingenzi mu gushyira mu bikorwa gahunda z’iterambere no kubaka umuryango ushoboye kandi wihagije.

Yasabye abafatanyabikorwa gukomeza ubufatanye n’Akarere, kunoza imikoranire no gushyira imbaraga mu bikorwa bifite uruhare mu kuzamura imibereho myiza y’abaturage no kwihutisha iterambere rirambye ry’Akarere ka Rulindo.

Iri murikabikorwa ryabaye umwanya mwiza wo gusangira amakuru ku bikorwa by’abafatanyabikorwa, kumenyekanisha ibyo bagezeho ndetse no kurebera hamwe uburyo ubufatanye bwakomeza kugira uruhare mu guhangana n’ibibazo abaturage bafite no guteza imbere Rulindo.

Imurikabikorwa ry’Abafatanyabikorwa b’Akarere ka Rulindo ryafunguwe  ku mugaragaro na Guverineri w’Intara y’Amajyaruguru Mugabowagahunde Maurice nawe yashimiye abafatanyabikorwa b’Akarere ka Rulindo ku ruhare rwabo mu iterambera ry’Akarere n’Intara y’Ayamajyaruguru muri rusange.