Inama Njyanama y’Akarere ka Rulindo yamuritse ibyagezweho mu myaka itanu y’manda yayo

Tariki ya 10 Nzeri 2026 , abagize Inama Njyanama y’Akarere ka Rulindo bakoze igikorwa cyo kumurika no gusangiza abaturage n’abafatanyabikorwa ibyakozwe n’Inama Njyanama mu myaka itanu ya manda yayo, kuva mu 2021 -2026.

Muri iki gikorwa, hatanzwe ishusho y’ibikorwa n’ibyagezweho mu myaka itanu y’manda y’Inama Njyanama y’Akarere ka Rulindo, byibanze ku nkingi eshatu z’ingenzi ari zo ubukungu, imibereho myiza y’abaturage n’imiyoborere myiza.

Mu bijyanye n’iterambere ry’ubukungu, hagaragajwe imishinga n’ibikorwa bitandukanye byashyizwe mu bikorwa bigamije guteza imbere imibereho y’abaturage, guteza imbere ibikorwa by’iterambere no kongera amahirwe y’ubukungu ku baturage b’Akarere.

Ku bijyanye n’imibereho myiza y’abaturage, herekanwe ibikorwa byagize uruhare mu kuzamura imibereho n’iterambere ry’abaturage, mu gihe mu nkingi y’imiyoborere myiza hagaragajwe uburyo Inama Njyanama yashohoje inshingano zayo mu gukurikirana no gufasha mu miyoborere ishingiye ku igenamigambi, kubazwa inshingano no guteza imbere Akarere.

Iki gikorwa kandi cyabaye umwanya wo kungurana ibitekerezo ku ngingo zitandukanye zijyanye n’iterambere ry’Akarere ka Rulindo. Abitabiriye bagaragaje ko ibikorwa byakozwe mu myaka itanu byagize uruhare mu iterambere ry’Akarere, banashimira abagize Inama Njyanama ku ruhare bagize mu gutegura no gukurikirana ishyirwa mu bikorwa ry’ibikorwa by’iterambere.

Umwe mu bakuru b’imidugudu yashimiye abajyanama kuko muri iyi myaka itanu bashoboye kubegera bagakorana ibikorwa bitandukanye birimo imiganda n’inama zitandukanye akaba anabashimira ko batabaherutse mu bikorwa byo kwiyamamaza no kubatora 

Perezida w’inama njyanam y’Akarere ka Rulindo DUSABIRANE Aimable avuga ko hari byinshi byakozwe muri iyi manda y’imyaka itanu  bigamije guteza imbere Abaturage birimo kuba harashyizweho ikigega cy’iterambere cyashyizwe  muri buri murenge.

Yakomeje avuga iki kigega gikomeje kugira uruhare mu gukemura ibibazo bitandukanye birimo kugabanya  ikibazo cy’igwingira mu bana bato ndetse n’inyubako zitangirwamo serivisi zitandukanye zirimo ibiro by’Utugari. 

Mu butumwa bw’Umushyitsi Mukuru, Dr Usta Kayitesi, yashimye ibyagezweho n’Inama Njyanama y’Akarere ka Rulindo mu myaka itanu ya manda yayo, ashimangira ko ibyo bikorwa ari umusingi ukwiye gukomeza kubakirwaho.

Yasabye abagize Inama Njyanama n’abandi bafatanyabikorwa gukomeza kugira uruhare mu iterambere rirambye ry’Akarere ka Rulindo no mu kuzamura imibereho myiza y’abaturage

Iki gikorwa cyo kumurika ibyagezweho muri manda y’imyaka itanu y’inama njyanamay’Akarere ka Rulindo  cyitabiriwe n’abayobozi n’abafatanyabikorwa batandukanye, barimo Umuyobozi muri Minisiteri y’Ubutegetsi bw’Igihugu (MINALOC),uhagarariye RALGA; Umunyamabanga Nshingwabikorwa w’Intara y’Amajyaruguru, abagize Inzego z’umutekano n’abandi batumirwa baturutse mu nzego zitandukanye.

Iki gikorwa cyo kumurika ibyagezweho cyasojwe hifuzwa ko ubufatanye hagati y’inzego z’imiyoborere, abaturage n’abafatanyabikorwa bukomeza, hagamijwe gukomeza gusigasira ibyagezweho no gushyira imbaraga mu bikorwa bishya bizihutisha iterambere ry’Akarere ka Rulindo.