Skip to main content Skip to page footer
Urubuga rwemewe rwa Leta y’u Rwanda
Coat of arms of RwandaAkarere ka Rulindo

Abakozi b’Akarere n’abayobozi b’ibigo by’ubuzima bahuguwe ku kwimakaza uburinganire n’ubwuzuzanye mu muryango

15 September 2026

Kuri uyu wa kabiri, Umuyobozi w’Akarere  wungirije ushinzwe Imibereho Myiza y’Abaturage, Bwana MUTAGANDA Théophile, yatangije amahugurwa y’iminsi ine ahabwa bamwe mu bakozi b’Akarere, abayobozi b’ibitaro ndetse n’abayobozi b’ibigo nderabuzima bikorera mu Karere ka Rulindo.

Aya mahugurwa yateguwe ku bufatanye n’Akarere n’umuryango uharanira kwimakaza ihame ry’uburinganire n’ubwuzuzanye hagati y’abagabo n’abagore   RWAMUREC, binyuze muri gahunda yiswe  Bandebereho, igamije kongerera ubushobozi abakozi bo ku rwego rw’Akarere ndetse n’abakora mu rwego rw’ubuzima, kugira ngo barusheho kugira ubumenyi n’ubushobozi bwo kwimakaza ihame ry’uburinganire n’ubwuzuzanye mu muryango.

Mu gutangiza aya mahugurwa, Umuyobozi w’Akarere wungirije ushinzwe Imibereho Myiza y’Abaturage, Bwana MUTAGANDA Théophile, yashimiye RWAMUREC kuba yaratangije iyi gahunda ya Bandebereho mu karere ka Rulindo kuko izafasha  guteza imbere imibereho myiza y’imiryango no kongerera ubushobozi abakozi bashinzwe gutanga serivisi ku baturage.

Yagaragaje ko kwimakaza ihame ry’uburinganire n’ubwuzuzanye mu muryango ari ingenzi mu kubaka imiryango itekanye, ifite uruhare rungana mu iterambere kandi ishingiye ku bufatanye hagati y’abagize umuryango.

Muri aya mahugurwa y’iminsi ine, abayitabiriye bazungurana ubumenyi n’ibitekerezo ku buryo bwo guteza imbere imibanire myiza mu muryango, guharanira uburinganire no kugira uruhare mu guhindura imyumvire n’imyitwarire ishobora kubangamira ubwuzuzanye hagati y’abagize umuryango.

Amahugurwa kandi azafasha abakozi b’Akarere n’abakora mu rwego rw’ubuzima kurushaho gusobanukirwa uruhare bafite mu gushyigikira imiryango no gutanga serivisi zifasha abaturage kubaka imiryango ibanye neza kandi itekanye.

Aya mahugurwa aje mu rwego rwo gukomeza ibikorwa bigamije guteza imbere uburinganire, ubwuzuzanye n’imibereho myiza y’imiryango, binyuze mu kongerera ubushobozi abafite inshingano zo gukorana n’abaturage no kubafasha gukemura ibibazo bibangamira imibereho myiza y’imiryango.

 

 

Back