Kuri uyu wa 1/6/2026, ubuyobozi bw’Akarere ka Rulindo  bwasuye Intwaza zitujwe mu Rugo rw’Impinganzima ruherereye mu Karere ka Bugesera, bashyikirizwa impano zitandukanye  

Iri tsinda ryari riyobowe n’Umuyobozi w’Akarere MUKANYIRIGIRA Judith hamwe nabandi bayobozi batandukanye barimo Umuyobozi wa  IBUKA na AVEGA AGAHOZO ku rwego rw’akarere, ndetse n’abahagarariye imiryango ifite ababyeyi batujwe muri uru rugo. 

Mu kiganiro cyatanzwe n’Umuhuzabikorwa w’Urugo rw’Impinganzima rwa Bugesera UMUHOZA Francoise yagaragaje imibereho y’ababyeyi bahatuye n’uburyo bakomeza kwitabwaho mu buzima bwa buri munsi.Anashimira  Akarere ka Rulindo kuba karatekereje gusura no gufata mu mugongo aba babyeyi barokotse Jenoside yakorewe Abatutsi.

Yongeyeho ko Ababyeyi bo muri uru rugo bagira uruhare mu guteza imbere imibereho myiza y’abaturage binyuze mu gufasha abana batishoboye kubishyurira amafunguru yo ishuri  

Bamwe mu babyeyi batuye muri uru rugo bagaragaje ibyishimo batewe n’uruzinduko rw’abayobozi, bavuga ko gukomeza kuzirikanwa bibaha icyizere n’imbaraga zo gukomeza ubuzima. 

Mu ijambo rye, Umuyobozi w’Akarere ka Rulindo MUKANYIRIGIRA Judith yasabye Intwaza gukomeza gutwaza no gukomera ndetse no kugira Icyizere cy'ubuzima kuko bafite igihugu cyiza kandi kibatekereza ,abizeza ko nk'abuyobozi bafite inshingano zo kubitaho no kubaba hafi. Yongeye kubashimira uruhare bagize mu kubaka igihugu nyuma y’amateka akomeye banyuzemo. 

Urugo rw’Impinganzima rwa Bugesera  rucumbikiye ababyeyi bagera kuri 70 barimo Abagore 64 n’abagabo 6.