Ibi byagarutsweho kuri uyu wa gatanu mu gikorwa  cyo kwibuka ku nshuro ya 32 Abagore n’Abana bazize Jenoside Yakorewe Abatutsi mu 1994. 

Iki gikorwa cyabereye ku rwibutso rwa Jenoside yakorewe Abatutsi rwa Mbogo ruherereye mu murenge wa Mbogo

Ni igikorwa cyitabiriwe n’abayobozi batandukanye ku rwego rw’Igihugu n’urw’Akarere, barimo Umuyobozi Mukuru w’Ikigo cy’Igihugu gishinzwe Imikurire no Kurengera Umwana, Madamu Ingabire Assoumpta, wari n’umushyitsi mukuru ndetse n’itsinda ry’abanyamuryango ba Unity Club Intwararumuri,  hamwe n’Intwaza zo mu rugo rw’Impinganzima rwa Bugesera.

Abitabiriye iki gikorwa bahawe ikiganiro cy’amateka ya Jenoside Yakorewe Abatutsi mu 1994, cyatanzwe na Nyirimanzi Gerald. Muri icyo kiganiro, yagarutse ku mateka yihariye ya Jenoside Yakorewe Abatutsi mu Karere ka Rulindo, agaragaza uburyo yateguwe ikanashyirwa mu bikorwa, ndetse anibutsa akamaro ko gukomeza kubungabunga ukuri kw’amateka no kukugeza ku rubyiruko.

Umuyobozi Mukuru w’Ikigo cy’Igihugu gishinzwe Imikurire no Kurengera Umwana, Madamu INGABIRE Assoumpta mu butumwa bwe  bwibanze ku kwihanganisha abarokotse Jenoside Yakorewe Abatutsi, gukomeza kubafasha mu rugendo rwo kwiyubaka no kubaho bafite icyizere cy’ejo hazaza. 

Yanagarutse ku nshingano z’urubyiruko zo kurwanya ingengabitekerezo ya Jenoside, guhangana n’abahakana n’abapfobya Jenoside Yakorewe Abatutsi, ndetse no gukomeza kubaka ubumwe n’ubudaheranwa bw’Abanyarwanda.

Abatanze ubutumwa banashimiye by’umwihariko ingabo zari iza Rwandan Patriotic Front zahagaritse Jenoside Yakorewe Abatutsi mu 1994, zikongera kubohora igihugu no gushyiraho umusingi w’iterambere n’umutekano Abanyarwanda bishimira muri iki gihe.

Igikorwa cyaranzwe no gushyira indabo ku rwibutso, gufata umunota wo kwibuka no guha icyubahiro abazize Jenoside, cyane cyane abagore n’abana bishwe urw’agashinyaguro bazira uko bavutse.

Muri uyu mwaka wa 32 wo Kwibuka Jenoside Yakorewe Abatutsi mu 1994, abaturage bongeye gusabwa kwimakaza ubumwe n’ubudaheranwa  kurwanya ingengabitekerezo ya Jenoside  no gukumira icyari cyo cyose cyahembere ingengabitekerezo ya Jenoside.