Ku bufatanye na Banki ya Kigali, abaturage baterewe ibiti bivangwa n’imyaka ndetse n’iby’imbuto ziribwa

Ku bufatanye na Banki ya Kigali (BK) mu Murenge wa Rusiga, Akarere ka Rulindo, kuri uyu wa 27 Ugushyingo, 2020 hatangijwe umushinga wo kuzamura imibereho myiza y'abaturage haterwa ibiti bivangwa n'imyaka n'iby'imbuto ziribwa ku buso bwa hegitari 250, ni ukuvuga ibiti ibihumbi ijana na bitanu (105,000) mu tugari twa Kirenge na Taba. Ni umushinga watewe inkunga na BK ugashyirwa mu bikorwa na EMS (Enterprise Multi-Services).

Ibi biti birimo iby’imbuto za avoka n’indimu, iby’isombe n’ibivangwa n’imyaka bigaburirwa amatungo (Lecena na Caleandra), ndetse na grevelia zivamo imbaho n’imishingirizo y’ibishyimbo.

Umuhuzabikorwa w’umushinga w’Ikigo ‘Entreprise Multi-Services EMS’ gitegura ingemwe z’ibyo biti kikanafatanya n’abaturage kubitera, Bizimana Modeste, avuga ko mu Karere ka Rulindo bafite amashyamba ahagije ariko bakeneye ibiti bibafasha kunoza imirire.

Bizimana avuga ko ibiti bizaterwa kuri hegitare 250 mu gihe kingana n’umwaka umwe umushinga uzamara, kuva muri Kamena uyu mwaka kugera mu mpera za Gicurasi 2021.

Abaturage bazabyitaho kugeza bikuze bigatanga umusaruro, na bo bateganyirijwe ibihembo by’amatungo magufi agizwe n’ihene 50.

Umunyamabanga muri Banki ya Kigali, Nkusi Emmanuel, yizeza abaturage ba Rulindo kuzakomeza kubafasha no mu yindi mishinga, ariko ko bagomba kwita ku biti byatewe bikazajya bigaragarizwa BK ko bitanga umusaruro.

Nkusi yagize ati “Rulindo ni akarere gafitanye amateka na BK, mu mafaranga y’inyungu ni mo ubuyobozi bukuru bwa BK bwemeje ko buzafashisha abaturage mu mishinga itandukanye, harimo n’uwo kubungabunga ibidukikije turimo uyu munsi”.

Umuturage wo ku Kirenge witwa Kayitare Servilien, ashima uburyo bagiye kubona imihembezo y’ibishyimbo kuko baterewe ibiti bya grevelia, ariko ko bazanabona ibyo bagaburira amatungo bya lecena na caleandra.

Umuyobozi wungirije w’Akarere ka Rulindo ushinzwe iterambere ry’ubukungu, Mulindwa Prosper, avuga ko BK bayibona nk’umufatanyabikorwa w’ibihe byose, kandi ko ubwo yateye ibiti na yo yizeye inyungu y’igihe kirambye muri Rulindo. Yasabye abaturage kubungabunga ibiti byatewe ngo bizakure neza kandi bibafashe kuzamura ubukungu bwabo no guhangana n'ihindagurika ry'ikirere. 

Ibiti bigaburirwa amatungo byitezweho kuzaba byeze mu gihe cy’umwaka umwe n’igice, naho iby’imbuto, isombe, grevelia na acacia bikaba byitezweho gutanga umusaruro mu gihe kiri hagati y’imyaka itatu n’itanu.

Umuyobozi w’Ikigo gishinzwe Ubumenyi bw’Ikirere (Meteo Rwanda), Aimbale Gahigi, mu izina rya Minisitiri w’Ibidukikije yahagarariye, avuga ko uretse gutanga ibiribwa no gukorwamo ibintu binyuranye, ibiti bituma habaho umwuka mwiza abantu bahumeka.

Nk’umuyobozi ushinzwe ibijyanye n’iteganyagihe, Aimable Gahigi avuga ko ibiti bigira uruhare rukomeye mu gukurura ibyuka byoherezwa mu kirere, bikaba ari byo bihungabanya ikirere kikarekura imvura nyinshi iteza imyuzure n’inkangu cyangwa amapfa aterwa no kubura imvura.

Umuyobozi w’Ikigo gishinzwe Ubumenyi bw’Ikirere (Meteo Rwanda) yasabye kandi abaturage kurengera ibidukikije bakoresha imbabura n’amashyiga birondereza ibicanwa, aho bishoboka bagacana gaz.

Rulindo ni Akarere k’imisozi miremire ikunze kwibasirwa n’isuri, ibi biti bikaba bizafasha mu kurwanya isuri ndetse no kurwanya imirire mibi.